كرونيك أنا وأختي سندرلا الجزء الاول

عسلامة لبنات اسمي فنون عمري  20 سنة مانيش بش نحكيلكم برشا على روحي باختصار  أنا ازين طفلة في الدنيا بدني يفتق  وشيك وكلاس ومتلعبني حتى طفلة كيما قلتلكم منحبش نشكر روحي خاطرني متواضعة برشا
نعيش مع بابا وامي واختي السكبانة نور أنا عمري معيطلها نور  سميتها برشا أسامي كيما نينا الحزينة اما أكثر اسم  شد فيها  سندرلا هاو باش نقلكم علاش اختي هذي نهار كامل تبكي وتمخط ديما هي المسكينة الطيوبة  الفينو لكيوت وزيد مربية في دار حياوانات على كل لون يا كريمة قطاطس على أرانب على عصافر تبدى تحكى معاهم والله كيف منحكيلكم يا لبنات مرة  عندها أرنب سمين مسيبتو يحوس في الدار  نهار دخلت لبيتي نلقاه ياكل في ساقين الفرش تاعي شديناه أنا وأمي عملنا بيه الفطور شطر عملناه مقرونة جات بنينة تفتق  وشطر طيبناه فالفور الي تحب نقلها عالاأفاح  لحطيطو تقلي  عاد نهارتها جات للا سندرلا عملتلنا زنازة في الدار وهي تبكي  وتتبربص هذا كفونا محشيين فالكوجينة تنصنفولها  ومرة  أخرى جاب خالي talon  من فرنسا يفتق نتعاركو عليه أنا وأمي وبنات خالتي والي تقيسو فينا تلقاه ضيق جات للا سندرلا مدت ساقيها جا قدها بالظبط راني تحمصت نهارتها  وبقالي في قلبي كل منشوفو في بيتها قلبي يوجعني
بصراحة أكثر حد نحبو في دارنا أمي أمي المثل الأعلى تاعي كل درج  بمشطة و vernis لون ديما نمكيجو مبعضنا ونعملو ماسك بالفقوس والطماطم  ونخرجو نعملو shopping شطر مصروف الدار الي يعطيهولها بابا نشريو بيه حوائج مالا  ! هي لمرا شنوا عندها في حياتها بخلاف أناقتها ومنظرها  قلو جمال الروح
أمي نحبها زادة  خاطر  مالصغرة فهمتني الدنيا كي وصلت للسزيام قتلي يا بنيتي فك عليك مالقراية يزي مقريت تضيعلك عمرك تحب تنجح في حياتك دبر راجل غني وتلها بروحك  تو هاك تعلمت  نقرى وتكتب عالأقل كي يقلك واحد اعطيني نومروك تعرف تكتبهولو وتعرف نقرى الأسوام كي تعمل شوبنڨ  فيه الف بركا  القراية برشا تجوجم  ماكش ترا فيهم الي يقراو برشا يبداو معقدين وعلى أعصابهم ونهار كامل  مكشبرين
ربي يفضلي ميمتي والله منعرش شكنت نعمل من غيرها والا راني تو في بعض الجامعات وقدامي  عرصة كتب ناقبة فيهم عينيا اللطف 

كرونيك أنا وأختي سندرلا الجزء الثاني

متقولوش الي أمي تحايل بيناتنا والله حتي أختي نادتها فهمتها  وحكاتلها نفس لكلام  اما هي بالرغم أكبر مني بعام ولات تصيح وتمخط ومشات تجري لبابا قتلو منحبش نبطل لقراية وتعاركو بابا وأمي هو يقلها مدامني حي بنتي ميبطل عليها حد لقراية وامي قتلو محسوب بش تطلعلك طبيبة تو تبور وتبقالك على قلبك هذا كان خيوط راسها مضربوش مالكتب الي تقرا فيها
حقا محكيتلكمش على بابا صحيح والدين ومتعتبروش كلامي قلت تربية اما هاذيكا لحقيقة بابا ياسر كبي  وماهو فاهم حتى كعبة مالدنبيا ساعة أنا ديما يطيحلي فالمورال  ويقلي الي اختي باش توصل وانا معنديش حتى مستقبل بالعكس أنا كل منرى صدري كبير و درياري نطمن الي بش يكون عندي كريار  كبير حقا الي تحب تعمل صدر وكريار تي دريار تدهن بزيت الحلبة وتاكل الشامية قبل مترقد  ريتو كيفاش  نحب الخير للناس لكل
 ننصحكم لبات زادة خليكم ديما relax ودلو رواحكم أنا نبدى ديما عاملة جو  ماسكات ومنكير وبديكير اما اختي سندرلا ديما تبكي مفهمتش علاش شنوا فيها كي نبدا أنا وأمي عاملين ماسك ومتكين فالصالة   وهي تمشي تغسل الماعون وتلم الدار وتحطلنا لفطور شنوا بش ينقس منها  وهي تتبكا وتتشكا تو أنا غالطة بربي هي لا تعمل ماسك لا vernis لا كرام  معناتها كي تقضي معندها علاش تخاف  موش كيفي نخاف ظوافري يتكسرو  وانا مخليت شعملتلهم باش طوالو  .. خليها تقضي ou moins  تعمل حاجة المثل يقول عاون النصارى ولا  قعدانك خسارة
وعندها كراست مذكرات  نهار كامل  تكتب فيها ديما مسكرة  بيتها والله نهار منغفلها ونقرا اش قاعدة تكتب المسوسة
شوف عاد أكا الذكريات الي تكتب فيها وهي عدات عمرها يا محشية بين الكتب يا تحكي مع الحيوانات يا ثقضي في شوية القضية الي مارجتنا عليهم أنا في بلاصتها نفسخ حياتي ونعاود  من جديد
متقولوش نكرها اختي الوحيدة راهي صحيح تمنيت يكون عندي خو مش اخت باش يصرف عليا ونكمل ندبر راجل من أصحابو لولاد اما اش بش نعمل هذاكا اش حب ربي
ياما حاولت نقربلها نقلها ايجا نعملك vernis و coupe  شعرها طويل قريب يمس فالقاعة  تقولش عليها تعيش في غابة  نقلها ايجا نعملك حواجبك يكتفو  شي النافع ربي تقلي نحب روحي naturel
باهي كول بالباهي هز صحتك  وادهن صدرك بزيت الحلبة  فمش متولي فيك أنوثة ويتضرب فيك واحد وانت الي يشوفك هكا  يقول ماناش قاعدين نعطيو فيك فالماكلة قتلي الأنوثة  موش كبر صدر وبرشا من هاك لكلام الصعيب الي مفهمت منو شي تعبت معاها والله

أنا وأختي سندرلا الجزء الثالث

Îومع هذا ما يأستش بقيت نزن علي أمي باش تعطيها طرف فلوس تشري بيهم حوايج  جدد  وتنحي هالشوالق الي لابستهم  وفاضحتنا بيهم قدام الناس عطاتها 400 دينار كاملين قلت خليها لعل تشري حاجة مزيانةمظخمة  نتسلفها من عندها  مشات شرات منهم robe princesse م frippe  تضحك مفهمتش مانا ارشيف خرجتها ظاهرلي هذي هي الروب الي لبستها سندرلا الحقيقية فالحكاية هههه والباقي شرات منهم جرمانة حطتها في الجنينة وزوز عصافر inséparable  طيور الحب  ..وشرات كتب وماكلة تاع قطاطس كل متلقى قطوس جيعان فالحومة تعطيه
أمي قريب تتجلط وحلفت  لا عاد تعطيها حتى فرنك وقتلي اعطيها حوايجك الي معادش تلبس فيهم تلبس والا. تقعد
تعدات ليامات و كبرنا أنا نكبر روصدري و درياري يكبرو معايا اما سندرلا كيف ما هيا كي عود الرشتة  ما زادت حتى كيلو  غاطسة في قرايتها وكل شويا تاخو شهادة تعلقها فالحيط  وبابا يقلي ريت اختك كيفاش هازتلي راسي  وانت  كان تحمر ودبغ  الجمال جمال الروح ودرا شنوة خليه ما فاهم شي هذاكا  كيما قالت امي ياخي هي جابت صيد من وذنو على جرد ورقة علقتها فالحيط ...
أنا الحمد لله عايشة فرحانة وعاملة جو أنا وأمي لا نخليو عرس لا وطية  لا سهرية لا دار جيران ديما حاطين الحطة  ومادين وجوهنا  كثرو خطابي الفقري والزوالي هذاكا نبعثو ديراكت منعطي فرصة  كان للغني ميهمنيش فيه  اعوج كبير موش قارئ المهم جيبو مليان لعيوب الكل تتخبى كان الفقر هكا كانت امي تقلي اما ديما منتفاهموش على صياغة والا باش يكتبلي دار والا معمل أمي تحب تضمنلي مستقبلي  بالباهي والي تقولو هي يمشي

كرونيك أنا وأختي سندرلا الجزء الرابع

jنهار روحت للدار كنت نعمل في شوبنڨ دخلت ريت في الصالة واحد بوقوس يفتق عينيه زرق قاعد مع بابا وسندرلا  شادة كتاب ودرا شتوري فيه  جيت بش نمشي نسلم عليه ونعرف شكونو يخي تذكرت الي أنا ملقيتش كرهبة حابسة قدام الدار  معناها السيد هذا فقري ايا ربي معاه هو وعينيه الزرق تعديت للكوجينة قلت ناكل ڨدمة خيرلي نلقى واحد من قطاطس سندرلا فوق الطاولة درا فاش يلحس الشاهية تسكرت الله يسد شاهيتها عيفتنا في عيشتنا هي وحيواناتها
كي روحت أمي حكيتلها عالسيد الي لقيتو فالدار قتلي يا بنيتي معارف بوك حكاية فارغة الكلهم منتفين كيفو توا 19 سنة وأنا نقلو ما فيها باس كان ترمي الصحبة على عرفك تهزلو كليمة علي زملائك نحكيلو شقاعد صاير في الشركة تو يرقيك ويحطك يدو ليمين وبعد كي تعرف دوسياتو يولي يخاف منك وينفذ الي تطلبوا وقتها  تقلو متلقاش لولدك عروسة خير من بنتي  وهو شي لا قدم لا وخر قاعد جرد موظف ويقلي عندي مبادئ خلي تنفعو  قلتلها أمي متقلقش روحك تو نتصرفو وحدنا
من نهارت الي جا السيد لدارنا وانا نرى في سندرلا  ماهيش عادية تبدا تسقي في النوار  متاع الجنينة ودور على بلاصتها يقلها بابا جيبلي كاس ماء تجيب قهوة وتمدها لأمي ديما سارحة وتتبسم وحدها  أنا ماني ذكية وميفوتني شي فهمت الي  خيوط راسها ضربو من كثر لقراية  و السيد هذاكا ميكون كان طبيب جابهولها بابا بالسرقة علينا

كرونيك أنا وأختي سندرلا الجزء الخامس

نجحت اختي فالباك وبابا حب يعمللها سهرية أمي قتلو علاش المصروف الزايد ياخي بابا كبش فالحكاية أمي قتلو باهي اما نص الليل بظبط يوفى كل شي خاطر نحب نعاود الحلقة الأخيرة تاع  المسلسل لا يزي فالقايلة متفرجتش وزيد تحرموني  نعودو توا بابا قلها باهي
لبست سندرلا أكا الروبة الي شراتها عندها سنين من grippe و talon الي جابهولها خالي من فرنسا قداش تستحفظ عالحاجة وعملت شعرها bouclée
أنا طرشقت بالطحك ياخي سهرية والا حفلة تنكرية هي الحق تبدلت الحلوفة وظهرت محلاها اما لحوايج يضحكو أنا معملت شي وأمي زادا بقينا بحوايج الدار خاطر غاسلين يدينا سهرية هذي منجمش نصطاد فيها راجل
جاو كمشة من اصحاب بابا كلهم رجال كبار وكعبات من صحبات اختي بقيت نخزرلهم بالرسمي الطيور على اشكالها تقع اللطف ولا وحدة عاملة طرف ڨلوس في فمها والا ماسكارا في عينيها كان العفشة والي شلاغمها يكتفو اما مشيت قعدت بحذاهم باش ميقولوش اختها متكبرة  حتى في سهرية  يحكيو عالكتب نجيب محفوظ  والمنفلوطي والا درا شسمو ملا كبي قلتلها نور عيش اختي برى حطلنا شويا  فن نبدلو الجو  مشات حطت ماجدة الرومي  يسمعني حين يراقصني  قلتلها شنوا هذا حطلنا حاجة اخرى مشات حطت الأطلال تاع ام كلثوم  واكا الشياب الي جابهم بابا يشربوا في التاي ويقولوا الله هاو الفن الأصيل  هههههه
هزيت روحي  ومشيت لبيتي ملا خنقة ما جانيش النوم بقيت نتفر ج فيهم مالشباك  نشوف في سندرلا كل شوي تجبد تاليفونها درى في شكون تطلب  وتطل من باب جنينة  اكيد تستنا في وحدة من صاحباتها الكبي  قلقت لبست البيجاما تاعي الي هي شورت قصير   و خلعة وقلت نعمل purfum  وماكياج اكاكا مالقلق جا نص الليل روحو اصحاب بابا وصحبات اختي كان وحدة جارتنا   أمي قالت  ايا سكتو علينا الحس خلي نتفرج  ياخي اختي بدات تتشحط فيها باش تزيد شويا قلتلها أمي بربى خليها لا تبدى تنوح علينا هالليلة  
سكتت أمي  وانا شديت بيتي  نشوف في سندرلا مالشباك ماشية جاية  وبعد قعدت  وبعد ريتها قامت تجري باش تحل الباب ياخي زلقت وطاحت على وجها  مت مالفجعة وقلبي طاح  خاطر كي طاحت شدت في الشريطة طيحتها وفيها روبتي لبستها مرة واحدة طاحت في  التراب في الجنينة  خرجت نجري الحمد الله يا ربي نلقاها لباس اي الروبة متقطعتش وما تمسختش  نسمع في الناقوس يضرب  والا اختي مزالت ممدودة  في بلاصتها  الصبر يا ربي كي انت متعرفش تمشي بtalon  اش ملبسك فيه 

كرونيك أنا وأختي سندرلا الجزء السادس

حليت الباب نلقاه أكا الراجل  الي لقيتو  المرة لفاتت في دارنا  اما المرة هذي لابس كوستيم gris  ونشوف في كرهبة نوار تفتتتتتق قدام دارنا أنا  كي نشوف الميكانيك يصيرلي اظطراب فالمشاعر ونتبلنتا بقينا درج أنا نخزر للكرهبة و هو يخزر لصدري وفخاذي  فقت بروحي باهتة قلي نجم ندخل قتلو تفضل دخلنا نشوف في اختي مزالت في بلاصتها  متحركتش مشيتلها قلتلها شبيك قتلي ساقي منجمش نحركها  ونشوف في السيد الي دخل مشالها ويقلها dsl نور  والله حبيت نجي بكري امامنجمثش خليتهم ومشيت ناديت بابا وأمي جاو لقاوها تبكي ومتنجمش  تتحرك حطوها في كرهبة السيد هذاكا ووهزوها للسبيطار  رجعوها بعد ساعتين ساقها في جبيرة  وساق لخرى مزالت في talon
مسكينة ساقها تكسرت الي مش مستانس بالبخور .. خليناها في بيتها ترتاح وبقينا نتناقشو في الصالة
-امي : ياخي شكونو الطفل هذاكا
بابا : وقتو تو
أمي : نحب نعرف
بابا : هذاكا أمين بوه قرا معايا
أمي : وشيعمل بوه
بابا : كان رجل اعمال  الله يرحمو توفى وخلى املاكو الكل لولدو هذاكا
بابا : وليد متربي ومتواضع تخيل محبش يقول قدام نور الي هو لباس عليه وقلها نخدم كاتب قصص
أمي : اخطانا مالحكايات الفارعة يا راجل طفل كيف هكا متعرفوش على فنون ؟؟ و انا تشوف فيا ساقيا حفات بش ندبرلها راجل لباس عليه  
أنا : بابا هذيكا كرهبتو ياخي
بابا : زايد مفيكمش دوا 

كرونيك أنا وأختي سندرلا الجزء السابع

 للا سندرلا  شدت الفرش والدار مسخة وانا وأمي بسيف منلموها وزيد نخدمو فيها مدولي كراست المذكرات وكلولي قطاطسي  ...
أنا مشيت تعبي فالماء  للعصافر متاعها  نسيت لقفص محلول  رجعت نلقي لقطوس كلا واحد ملعصافر متاعها طيور الحب هذوكم  مشيت قلتلها ولات تبكي وتنوح  وانا نسكت فيها أمان عيش أختي  اسكت والله نشريلك عصفور اخر ودجاجة وهي باقي تنوح باهي نزيدك معاهم كلب ؟؟؟ شي كملت تبكي وعملتهم الكل قتلي هذوكم طيور الحب كي يموت منهم واحد معناتها  بش يتفرقو العشاق وقتها فهمت لحكاية الكل فهمت الي هي موش فعقلها  تهتري مالسخانة وأنا عندي ساعة نكسر معاها في راسي خليتها وخرجت
نلقى أمي  تزن على بابا باش يستدعى امين يتعشا بحذانا  وهو يقلها فاهمك فاش تكمبص راهو  المهم الكلمة الأخيرة كانت لأمي  

كرونيك أنا وأختي سندرلا الجزء الثامن

أمي قتلي الليلة نحبك تحط الحطة نحبك قمر 14  برا حضر لبستك قلتلها أمي والدار شكون باش يلمها قتلي الله لا تربحها مقصوفت الرقبة اختك ملقات وقتاش تتكسر  بديت أنا وأمي نلمو تعبنا برشا ماناش مستانسين  تعبنا ومشينا قيلنا الوقت تعدا فقنا مخر تفجعنا مازالت ساعة ويجي أمين واحنا مقضيناش قضية لعشا حرنا شنعملو ياخي جاتني فكرة أكا الجرمانة الي مربيتها اختي في جنينة نهار كامل واك واك كسرتلي راسي هزيتها لجارنا ذبحها  وفوحتها وحطيطها فالفور وخليت أمي لاهية بالباقي أنا صحيح منحبش القضية  اما في التطييب نعجبك خاطر أمي قتلي السر بش تسيطر عالراجل هو فالماكلة شوف بوك قد منتعاركو  مينجمش يسلم فيا  وكي نحط   قدامو صحن الكمونية يتحول ومعادش يرفضلي حتى طلب
مشيت لبيتي  عملت مكياج حلو وجبدت شعري ولبست روب rouge  قصيرة  اما مفصلة بدني باين بالتفصيل حبيت نبدل  اما مبقاش وقت
خرجت بابا قالي شنوة الي لابستو وأمي قتلو سيب الطفلة خليها تلبس كي اندادها مشيت لجنينة قصيت وردات ملى زرعتهم اختي بش نزين بيهم الطاولة ياخي سمعت الناقوس يضرب مشيت  حليت الباب نلقى  امين جا  بقى يخزرلي مالفوق اللوطا وعينيه بش يكلو بدني قتلو تفضل ادخل قلي مدموزال ظاهرلي متعرفناش قبل قتلو انا فنون خزرلي خزرة حارة وقلي فنانة  بالرسمي  دخلنا للدار أمي فرحت  بيه سأل على نور ياخي أنا قتلو راهي  راقدة بصراحة كذبت عليه  خاطر الطفلة طالعتلها  السخانة تمشيش تبدى تهز وتنفض قدام الراجل وتحكي عالعصافر والوز
قلي باهي جبتلها شوية روايات كي تفيق اعطهملها
أمي قلتلنا العشا حضر تفضلو معايا تعجبني أمي قد متبدا  متغشة وكشاكشها خارجة قدام الضياف تولي فينو وكلاس يقوى عليها ربي قداش تعرف تمثل
أمين عجبو العشا وبقا يشكر في أمي قتلو  أمي بنتي فنون هي الي طيبت قلي تبارك الله عليك فنانة في كل شي  عملت روحي حشمت بابا جاه تلفون خرج يحكي في الجنينة كي عادتو  وامين سأل على تواليت  فين ومشا خلى تلفونو بحذانا وبزهر فما شكون طلب  مقيد عليه الأميرة  شكوني هذي منين طلعتلي  علقت عليها ياخي جا  msg  وينك موش قلت بش تجي الليلة
بقيت نخمم شتعمل  وزادت بعثت msg اخر  امين نحب نصارحك بحاجة أنا  معادش انجم نخبي أكثر  أنا نحبك نعشقك انت الوردة  المزيانة فسط جنينتي الذابلة انتي الفيوزة الي تضوي بيتي الظلمة  انا الرواية وانتت البطل  انا الشجرة وانت الجبل أنا كاسة الحمام  وانت السطل
عيني وجعتني مالقراية ملا جريدة يا بو قلب  جاوبتها أنا عندي شكون وانت كي اختي وتعمل مزية معادش تقلقني  وحطيت نومروها في liste noir  وبدلت نومرو تاع centre de messages باش معادش يجيه حتى msg
رجع امين بحذانا سألتو أمي على خدمتو و فاميلتو  وبعد سألتو خاطب والا معرس  قلها مزلت ملقيتش بنت الحلال  قتلو حتى بنتي فنون هاك ترا زين وعين وبدن وصنافة ديما يخطبوني فيها اما  منحبش  نعطيها لحد منعرفوشو بالباهي نحب نتهنى عليها مع وليد نعرفو اصلو وفصلو كيفك انت  ياخي قلها كان فنون توافق أنا يشرفني ناسبكم  أمي قتلو لحظة نادي بوها احكي معاه
بقينا وحدنا شدلي يدي قلي بلي ريت بدونات اما الشي الي عندك مريتوش ضحكت بيني وبين روحي قلت حتى انا خاسرة عليهم 10 بادن زيت حلبة وزوز طرانط شامية

كرونيك أنا وأختي سندرلا : الجزأ التاسع

جا بابا  حكا معاه أمين وبابا تحسو مهوش مصدق المهم تفاهم مع أمي على الذهب وكل شي وحددنا دات الخطبة  روح  أيمن وبابا قاعد يعاود في كلمة وحدة أن كيدهن عظيم أن كيدهن عظيم
حسيت روحي فرحانة برشا محلاها كي تجني ثمرة الجهود متاعك تذكرت اختي قاعدة وحدها قلت نمشي نتفقدها لقيتها تبكي بالشهقة اللطف يا ربي لتوا تبكي عالعصفور عنقتها وبقيت نسكت فيها قلتلها انت اختي الوحيدة صحيح منتفاهموش برشا  وانا منجمش نفهمك اما راني نحبك سكتت شويا قلتلها هاني باش نجيبلك عشاك حتى للفرش وعندي ليك خبر باش يفرحك برشا مشيت حطيتلها عشاها وزينتلها الطبق بالورد  قتلي شنوا هذا قلتلها بايك مالجرمانة مانا ذبحناها وعملناها روتي  وهاني قطفت الوردات زينتلك بيهم الطبق قامت تتهز وتتحط كواكا لاا علاش تعمل هكا  قلتلها عيش اختي اكبر في مخك أنا حبيتك تفرح معايا بش نقلك الي أمين خطبني الليلة وانت ت حكيلي عالجرمانة  اختي بدات تصيح عليا علاش تفسدلي كل حا حة  مزيانة في حياتي أمين كواكا  الوردة الي زرعتها وسقيتها مفهمت منها شي قريب بش تغنيلي الوردة الي نحكي عليها  بابا سمع الصباح جا يجري ويسأل فيا شعملت لختك وأنا نحلف الي معملتلها شي
جا نهار fioncail   لبست روبة مزيانة وأمين عجبتو برشا اما أختي طلع قلبها أكحل بقات في بيتها بالرغم نحات الجبيرة اما عملت روحها مريضة  هءذا الكل علي خاظر جرمانة هاني بش نخليهالها الدار تربي فيها حتى بڨرة
نهار متعدية من قدام بيتها مريتهاش لداخل كي السبة خلات باب بيتها محلول  قتلني الفضول باش نعرف شقاعدة تكتب في كراست المذكرات دخلت حلييت الكراسة منين باش نبدى هذي موسوعة موش كراسة قلت برى نقرى مالاخر نلقاها كاتبة  : أختي قاسية القلب خطفت سعادتي دون رحمة وسرقت مني أمين الذي احببته حبا عظيما بسبب حبه للقصص فهو مسالم ونباتي لا يأكل لحوم الحيوانات ويحب الفقراء  ويعطف عليهم
تنرفزت علخر أأنا قاسية القلب يا سكبانة وقتاش حبيتو انت أمين وانت تحب حاجة في حياتك  بخلاف لكتب والحيوانات  وشكون نباتي أمين عندك حق مريتوش  وهو ياكل فالجرمانة كي الحلوف و شكون قلك يحب الفقراء  تي حڨار وڤياس كملت نقرا احببته لأنه فقير لا يملك سو ى قلبه الطيب تو فما وحدة تحب واحد خاطر منتف مالا  هاو طلع ماخذك على قد عقلك ويفرك فيهم حسيت الدم طلعلي لراسي سكرت الوزة وخرجت
بعد سخفتني اختي انا راني حنينة برشا  والله يا لبنات  وراس  ميمتي كان جيت نعرف الي أختي  تحبو راني أجلت الخطبة نهارين ثلاثة لين تنحي لحكاية من راسها
عملت عرسي أنا وأمين وعمري ما ننسى وقفة الساحرة الطيبة معايا نحكي على أمي الي بفضل نصائحها وصلت للهدف متاعي

كرونيك أنا وأختي سندرلا الجزء الاخير

عدينا شهر العسل راجلي قلي الي هو يحبني ونهار كامل لاسق فيا الحمد لله عاملة لخير في دنيتي وربي عطاني على قد قلبي ديما نتفكر أختي ومرات نقول بالك أنا سرقتلها فرصتها بالحق  نهار سألت راجلي شنوة رايك في أختي نور قلي بنية رقيقة عندها خيال واسع كنت نشيخ على حكاياتها والموندو متاعها نحسها أميرة اما مفهمتش شبيها معادش تحكي معايا قتلو كيفاش أميرة قلي  كيما بيضاء الثلج  بقيت نخمم بيني وبين روحي اختي انا الدغفة كيف بيضاء الثلج ازين وحدة واكثر  وحدة حطايطية في بلادهم والي يقلك عقارها قوي مرت بوها الشمطة ومنجمتهاش وزيد باتت مع 7  رجال وفي لخر ضربت على قلبها أمير    قلي شبيك سكت قتلو لا متنجمش تكون بيضاء الثلج ضحك وقلي مالا عروس البحر  رجعت نخمم لا لا  تي هي عروس البحر شطر مرا وشطر حوتة وفدت مالعيشة مع الحيوانات  في البحر وشربت السحر وولات أنسان ودبرت أمير واختي نهار كامل حاصرة روحها مع الحيوانات في البيت وزيد طلعت تحب على راجل فقري
قتلو حتي عروس البحر لا  قلي مالا جميلة شكون جميلة ؟؟؟ قلي جميلة والوحش  هههه خرف هاذيكا أكثر وحدة فاهمة اللعبة اش خلاها عرست بوحش على خاطر فلوسو وكادواتو  سإلني فاش نخمم ياخي قتلو أختي متنجم تكون كان سندرلا ضحك وقلي حقا فردة صباطها من وقت هزيتها للسبيطار   لتوا في الكرهبة
قتلو أمين نسألك وتجاوبني بصراحة  قلي اوك  قتلو كان جيت ماكش معرس وخيروك بيني أنا ونور شكون تختار قلي نختارك انت  صحيح نور طفلة مثالية  اما الراجل يحب كي يروح للدار يلقى بدن حلو لبسة مزيانة ريحت parfum بنينة  ماكلة فاوحة موش مرا غاطسة في كتاب وقطوس يحوس فالبيت  نور تنجم تسمعها تعجبك تحلم معاها اما فالواقع منتصورش نجم نخو وحدة كيفها
طمنت بعد كلامو و 1% تأنيب ضمير الي عندي مشا على روحو  وكملت هزيت صباطها مالكرهبة حطيتو في ساشي وكي مشيت لدارنا فركست على الفردة لخرى وهزيتها وكي عملنا  فواياج لتركيا لوحتهم في البحر باش نضمن الي الأمير معادش يلوج عليها  وتو هاني عايشة فرحانة ومتمتعة بفلوس راجلي و منسيتش أمي مالذهب والكادوات وأختي هاذيكا نحبها نشالا ربي يخفف مكنوبها وتاخو حتى مكتباجي  والا مربي حيوانات قبل متجلط أمي والا ترجعلهم الدار حديقت حياوانات




وهاذم شويا نصائح
* عندك مأخرة كبيرة يعيشك أميرة
* لا تكتبلو قصيدة شعرية لا تعزفلو سنفونية ركزلو عالمصلي والكمونية
ما تاخذوش فقري يبكيك خوذو كرزة يهنيك
*يزيك مالقراية لا ينفعك كتاب ولا رواية الفايدة في تصويرتك فالمراية
*اضرب ضربتك لا يهمك في صاحبتك لا أختك
نحبكم الكل لبنات وربي يقدرني علي فعل الخير فغعههههههه




***★*""***★*

تمت بحمد الله
★**★★**★*

كرونيك اغتصبني أستاذي الجزء الأخير

بصراحة ما غاظنيش منتصر وما تشمتش فيه ما حسيت بشي
روحت مع راجلي نطلو على دارنا الناس الكل قالولي قداش واتاك العرس وليت  تهبل   .
أنا عندي retard fi les règles حبيت نعمل analyses ونتأكد مالحبالة باش نفرح أمي وراجلي مقلت لحد مشيت ل كلينيك عملت analise  من غدوة رجعت مع راجلي خاطر منجمتش نخبي عليه  الطبيبة قتلي مبروك  مدام طرت مالفرحة  وراجلي يعنق فيا وانا نقلو الناس نخزر  قص علينا فرحتنا صياح جاي مالكلوار مشينا نطلو  نشوفو في راجل طايح فالقاعة في حالة هستيرية يصيح لا موش ممكن لا  وتلمو بيه الطبة يهديو فيه قربنالو الوجه هذا نعرفو بالباهي  هذا أنيس الي اغتصبني وحطملي حياتي نسمع في فرملية تسأل شفما شنوا الحس هذا ياخي جاوبتها صاحبتها مسكين فاق بروحو عندو سرطان فالمرحلة الأخيرة
أنا محسيت بشي لا كره لا حقد لا شفقة لا شماتة لا فرحة  اما نتذكر الي هو كي قام خزرلي في عيني وبعد خزر لراجلي
 حسيتو حب يقول حاجة ومنجمش  من غدوة قلت لراجلي نحب نشوف psychiatre  مالول راجلي تحير اما كي قتلو جيست نحب نسألو على حاجة وافق
مشيت للطبيب وحكيتلو حكايتي وسألتو علاه محسيت بشي طمني وقلي الي هذي حالة تتسمى الانفصال العاطفي كيف حد يظلمك برشا ويقهرك ما عادش تنجم تخرج حتى شعور تجاهو لا باهي لا خايب
تجاوزت المرحلة هذيكا والدنيا ضحكتلي جبت بنوتة مزيانة وراجلي حاطني في عينيه  وديما نحمد في ربي الي ربي عوضني اما تعلمت برشا دروس من تجربتي هاني باش نقولهملكم باش مطيحوش في أغلاطي
👍

1 الثيقة الزايدة لا ديما خلي عندك شويا شك ومتعمل خطوة الا  ما تاخو  احتياطك
2 متصدقش لكلام الا متشوف الفعل  وما تتنازل على خاطر حد ديما الشخص الي تتنازل على خاطرو  يعفس عليك خليك رزينة والي يحبك يجي لداركم المتعة تفوت اما العار يبقى
3 داركم اقربلهم صارحهم شاركهم في مشاكلك ينجمو يتغشو عليك اما هوما بركا الي ينجمو يعاونوك مغير مقابل مغير حسابات
4 خليك متفائلة مهما  صار لك في حياتك رحمة ربي واسعة وديما فما خير فالدنيا
5 متسكتش على حقك خوذ حقك بالقانون
6 متظلم حد الظلم ظلمات يوم القيامه  والدنيا دور  والحزن الي تذوقو لغيرك ليوم تذوقو غدوة
7 عمرك متضيع  وقتك في انك تدعي عليى حد بالخايب مهما ظلمك خاطر والطريقة هذي تبقى ديما مركزة معاه ومع الي صارلك  وتعبي حياتك بالطاقة السلبية ديما ادعي ربي يعوضك يفرحك يصلحلك حياتك ينجحك ..حاجات ايجابية الرسول صلي الله عليه وسلم كان  يدعي :  اللهم اني أسألك الهدى والغنى والعفاف والتقى
واذا كان  قلبك معبي على حد قول يا ربي انصرني عليه
8 خليك ديما قوية وسامح روحك وابدى صفحة جديدة ما فما حد بش يجي يبدلك حياتك انت تبدلها وحدك والشخص هذا ممكن يجي في حياتك اما كون متأكد ة الي عمرو ميجيك وانت في حالة ضعف يجيك وقت تبدى قوية من داخل وتتعلم تحب روحك وتخزر لقدام ( كل شيء سيأتيك عندما تكون جاهزا ..عندما تستحقه

**************
        تمت بحمد الله
****★*★*★★

كرونيك اغتصبني أستاذي الجزء الثامن

بعد جمعتين دق الباب حليت نقاها أماني وأمها وبوها وخوها ايمن دخلتهم وانا فرحانة مشى في بالي جاو باش يستدعاونا للعرس ودارنا زادا فرحو بيهم خاطر  ديما نحكيلهم  على أماني يخي أمي جبدتني على شيرة وقتلي برا  بدل هالشوالق الي لابستهم قدام حماتك و خطيبك حماتي وخطيبي ؟؟  وتذكرت الي أنا وريتلها قبل تصاور أيمن وأمو وقلتلنا باش يخطبني يا ربي اش بش نعمل أنا توا فالورطة هذي وكان أمي تقول حاجة قدامهم نبقى في الحشمة  دخلت لبيتي وسكرت لباب  وبقيت نخمم وبعد شويا نسمع في التزغريط وامي جات دق عليا دخلت تلقاني قاعدة عالفرش قتلي لتو ما لبست شبيك ياخي وبدأت تلبس فيا وتقدلي في شعري  خرجت وانا ماني فاهمة شي امو تبوس فيا وتقدلي مبروك واختو تحمل فيا وهو يخزرلي ويتبسم ومن كلامهم يديت نفهم الي أيمن جاب دارهم و جا خطبني اما كيفاش وعلاش ؟؟؟ أماني حست الي فما حاجة فالموضوع و حستني متقلقة قتلي -مريومة موش قتلي الي انت ترسم وعندك برشا طبلوات راسمتهم في بيتك  ؟؟
امها قلتلها وقتو توا اما هي طفاتها
مشينا للبيت قتلي مريم منحبش نشوفك هكا شبيك احكيلي شفما قلتلها أماني يلزمني نحكي مع خوك أمان
خرجت أماني
منعرفش شنوة عملت وشنوة قلتلهم المهم  جا أيمن بحذايا للبيت وبقيت نتلفت للكلوار  ملقيت حد
أنا : علاش تعمل فيا هكا شعملتلك ؟
أيمن,: dsl  ظاهرة ماكش فرحانة عندك شكون في حياتك مالا شبيها أماني قتلي معندها حد ؟
أنا  : موش هكا لحكاية  إنت كيفاش تجي اخطبني وانت متعرف عليا شي
أيمن  ؛  coup de foudreمن أول نهار ريتك فيه عشقتك انا منعرش شنوا مشاكلك اما تأكد الي باش تلقاني معاك
طرشقت بالبكا وقتلو
مانيش فيارج وكانت عندي علاقة بواحد قبلك
أيمن : كل أنسان عندو أغلاطو أنا زادة كانت عندي علاقات ببنات قبلك أنا ميهمنيش  في ماضيك يهمني فالحاضر والمستقبل كهو
أنا : أكيد بش تكون عندك علاقات الرجال الكلكم كيف كيف  تغرو ببنات الناس وتلوحوهم
أيمن : أنا صحيح غلطت وكانت عندي علاقاتي اما عمري ما أثرت على طفلة ووعدتها بالعرس ولا غربت بيها ديما نبدا واضح مالأول وانت ماك بت في داري عملتلكش حاجة ؟
سكت وبقيت نخزرلو
أيمن : خلينا نعرفو بعضنا بالباهي وكان رتحتلي نعملو financial و نعرسو السنا وكان مرتحتليش تنجم تبطل في أي لحظة
تعدات ليامات وعرفت أيمن بالباهي طلع أنسان راقي وحنين رومنسي ومخو كبير بئر حكيتلو الي صارلي الكل وهو  وعدني  باش ينسيني الي صارلي الكل ويدللني ويعيشني فرحانة بالحق حبيتو  بالرغم الي هو مزيان ولباس عليه أكثر حاجة شدتني ليه رجوليتو  وحنيتو  .

عملي عرس تحلم بيه اي طفلة  عدينا شهر  العسل في  تركيا و بعدها عدينا  15 يوم في Paris ورحنا مشينا نطلو علي دارهم وعلى أماني الي عرست قبلنا بشهر  فرحت بيا أماني وقتلي مريم تتذكر منتصر أكا الوليد الي ديما يقعد هو وصاحبتو فل café الي نقعدو فيها وقلتلها شبيه قتلي مسكين عمل  accident ولي في Chaize roulante
كان تراه كيفاش ولى يسخف وسلألني عليك وقلي قول لصاحبتك تسامحني قلتلها أكيد د غالط في طفلة اخرى 

كرونيك اغتصبني أستاذي الجزء السابع

تعدات ليامات وجات soutenance تاع اماني شدت فيا الصحيح باش نلبس روب خاطر صاحباتها الي باش يحضرو الكل باش يلبسو روب نهارتها الناس الكل قالولي خرجت محلاك كي princesse
جاو صحبات اماني وعايلتها كل وحدة جابت معاها صاحبها والا خطيبها واماني تسأل في امها فينو ايمن خويا وامها تقلها هاو جاي  اماني قتلي امان اخرج معايا نشرجي نكلم خويا شبيه لتوا  خرجنا ياخي قتلي هاو جا ساياي خزرت لقيتو نفس الطفل الي بت في دارو تصدمت ودخلت بعضي واختو تقلو شبيك لتو سي شباب وهو يخزرلي وانا نخزرلو  وأماني تسأل فينا ياخي نعرفو بعضكم واحنا ساكتين جات اماني حطت يدو في يدي وقلتلنا ايا باهي كي طلعتو تعرفو بعضكم ادخلو مبعضكم  متبقاوليش انتم الزوز في الحفلة كل واحد وحدو كالبطة اليتيمة  دخلنا مبعضنا واماني ماللهوة بخوها نسات خطيبها الي تلقاه يستنى فيها
امها صدقت الي أنا صاحبت ولدها كل شويا تقلي تبارك الله  على كنتي  و ولدها يضحك اول مرة نثبت فيه مزيان برشا وبدنو musclé  بالرغم لابس كوستيم اما ظاهرة الفورمة تاع بدنو عينيه خضر وفيهم لمعة   حلوة  الناس الكل قالولنا محلاكم مبعضكم تعدات soutenance محلاها وعملت تصاور مع اماني وعملتلي تصاور مع خوها وامها وستدعاتني لعرسها في الصيف قلتلها الا منشاور دارنا خذات ل adresse متاعنا وقتلي تو نجي نهزك انت وامك واخواتك   .
جات العطلة و روحت لدارنا فرحت توحشت أمي وبابا وخواتي اما بعد نهارين جبدولي موضوع  الي ولد عمي يحب يخطبني وبدا المرج وانا نتهرب صحيح ولد عمي ingénieur وعاقل  ونحسو يحبني من قبل  اما مستحيل نجم نصارحو بحكاياتي هذا الي ناقص نبقى فضيحة في وسط فاميلتي وأقاربي أمي كبشت فالموضوع ياخي قلتلها عندي شكون يحبني ونحبو وباش يخطبني بالطبيعة نكذب أمي مصدقتنيش وقاتلي قاعدة تتهرب وكل منجبدلك عالعرس تتبدل أنا ملقيت منقول جاتني فكرة مشيت وياها تصاور ي مع خوها اماني وأمو  أمي فرحت وقريب تقوم تزغرط وتسكر موضوع ولد عمي

كرونيك اغتصبني أستاذي الجزء السادس

لقيت روحي في الشارع نمشي كالمتشردة معرفتش فين نمشي ل foyer سكر ولبنات الي نعرفهم روحو لديارهم بقيت نمشي والشتا تصب عليا لين وصلت بحذا ل foyer وبقيت ندور وتلمو بيا اولاد ظاهرين شاربين  وكل واحد يقلي كلمة شبيه الزين ساهر وحدو  اطلع نوصلك ..وانا وليت نبكي ونقلهم امان سيبوني ابعدوني  أنا هكاكا وجا واحد ظاهر  يعرفهم هبط مالكرهبة وبقا يخزر وقلهم سيبوهالولاد تابعتني راهو قلو واحد منهم صحة لأمك طيح كان بالممو الي عندو الكعب يعرف قد ميحب
مشاو لولاد وبقيت أنا واياه قالي مدموزال كان معندك فين نمشي تجي معايا للدار ؟؟  حسيت بالحقارة والتقزز عالم مسخ كرهت روحي وحبيت ننتقم من براءتي ونكون عاهرة كيما حبوني نكون خزرتلو وقتلو اوك نمشي معاك للدار  وصلنا للدار دخلنا وراني بيت قلي تفضل تنجم ترتاح هوني خوذ راحتك فالدار ما جاوبتوش وتلوحت عالفرش نستني فيه باش يحل الباب ويعمل فيا كيما عمل غيرو مالوحوش الي عرفتهم  دق الباب ودخل  جابلي غطا وكاس شكلاطة سخونة قلي بونوي وسكر الباب وخرج الليلة هاذيكا مرقدتش نخزر للسقف ونتذكر  في تصاور الكحلة
صباح دق عليا الباب حليتلو قلي مدموزال كان عندك فين ماشية نوصلك في طريقي وكان تحب تبقي الدار دارك قبل منجاوب طلبتني أمي حكيت معاها كلمتين وعلقت وطرشقت بالبكا قربلي حملني وبدا يمسحلي في دموعي اول مرة راجل يحملني مغير ميرمي يديه  ويحاول يبوسني مغير متوفي لحكاية فالفرش كي سكت بعد عليا وقلي خوذ راحتك وحضر روحك مشيت غسلت وجهي ولميت شعري كعكة نخزر لوجهي شاحب  وعينيا منفخين خرجت قلي مدموزال ايجا افطر قتلو منحبش قالي  حتى انا مانيش باش نفطر ايا نوصلك طلعت معاه فالكرهبة قلي فين بش تمشي قتلو وصلني لل foyer  وصلني وبقا يخزرلي ويخمم هبطت مغير مقتلو مرسي
  بقيت نخمم قلت ما لازمنيش نستسلم لازم نكون قوية اقوى مالظروف الي حطمتني بزي ما كنت طيبة وعلى نيتي توا يلزمني نفيق لروحي  قصيت شعري قصير برشا ودخلت نترانا بش نخرج الطاقة السلبية في sport بعد اشهرة بدني تبدل ظعفت ووجهي ضوى ونفسيتي تحسنت  وليت معملة على روحي منستنى حد باش يسخف عليا والا يحس بيا
في salle de sport
تعرفت على بنية اسمها اماني  ولينا صحاب ديما نخرجو هي انسانة قوية ايجابية ومتفائلة وتحب الدنيا الوقت معاها يتعدي فيسع اما خسارة هذا اخر عام ليها فالجامعة بش تخلي عليا بلاصة وعلى ذكر التخرج منتصر زادا هذا اخر عام ليه فالجامعة وباش نرتاح من وجهو ديما نشوفو يخزرلي يحب يقول حاجة أنا مانيش قاعدة نرى فيه بالرسمي مانيش نمثل  معناتها معاد يعنيلي شي ديما يجيب صاحبتو ويبداو يتمعشقو بحذايا ويقعدو فل café الي نقعد فيها وانا منعملش روحي ما ريتوش بالعكس نخزر عادي نوصلو الي راني شفتك وعادي متحرك فيا شي  مازلت عايشة حطمتلو الغرور متاعو مالليلة هذيكا عمري مكلمتو عمري لا حاولت نفسرلو والا نسمع منو تفسير  وليت بنية ايجابية عملت برشا صحاب وليت نشارك في الأحداث الثقافية الي تنظمها الجامعة ونتكلم قدام الناس الكل بكل ثيقة

كرونيك اغتصبني أستاذي الجزء الخامس

هو قلي هكا وانا طرشقت بالبكا وخليتو ومشيت
اي طفلة تفرح كي يقلها الشخص الي تحبو نحب نكون  نكون معاك ونكمل معاك حياتي اما أنا تذكرت حكايتي لقديمة كيفاش بش نقلو الي أنا مانيش vierge و زعما يصدقني زعما ما يتبدلش معايا أحسن حاجة نجبد روحي
من غدوة مشيت نعمل في photocopie نلقى منتصر قدامي خزرلي بنظرة  حزينة وقلي شبيك عملت معايا هكا امس طبست راسي وخرجت وهو تبعني بقينا نتمشو
-مريومة انت عندك شكون في حياتك
_ لا
- مالا عندك شكون تحبو وقصيتوها ومنجمتش تنساه
-
لا عمري مصوحبت
منتصر فرح موش نرمال  وقلي مالا اأنا اول راجل في حياتك
قتلو اي
رجعنا نتقابلو كالعادة  وزدنا قربنا لبعضنا ديما لاهي بيا ويعامل فيا كالأميرة صارحني بحبو وصارحتو بحبي وأنا فرحانة قلت اكيد حتى كي باش نحكيلو حكايتي باش يفهمني نهار حبييت نصارحو قتلو حبيبي باش نحكيلك حكاية يلزمك تعرفها اما راني معنديش ذنب فلي صار  وحكيتلو حكايتي نحكي فيها ونبكي وهو باهت فيا ما قال شي وبعد شويا قلي يلزمني نمشي
أنا تفهمت الموقف فهمت الي هو مصدوم ولحكاية جاتو على غفلة وبقيت نطلب في ربي أنو يتفهمني ويتقبل لحكاية
بعد نهارين كلمني قلي الي هو يحبني وما يهموش في ماضيا ورجعنا اما لاظت الي هو ولى ديما يحكيلي عال bisous و لجنس وكي نقلو كيفاش تحكي هكا يقلي الي هو يحبني ومينجمش يصبر عليا مفهمت شي اما صدقتو

 في réveillant اقترح عليا باش نعديو سهرية مبعضنا قتلو كيفاش ميجيش قلي كيفاش تخاف مني وأنا اكثر حد يخاف عليك نحب نبدى عام جديد معاك نحب نسهرو في الدار وجدنا  أنا خممت بعقلي وخممت بقلبي وقلبي غلب الله غالب حبيتو وعندي فيه ثيقة اكثر من روحي
لبست روب نوار مزيانة وعملت ماكياج حلو عندي برشا مفرحتش وملبستش حاجة حلوة وصلت للدار نوقزت خرجلي حملني ودخلنا نلقي الدار كلها شموع وامبولات وورد وقلوب وألوان الجو حلو ورمنسي فرحت اكثر قربلي حملني وشطحنا شويا قربلي  باسني أنا ذبت مخفتش بالعكس حسيت روحي فرحانة بدا يقربلي اكثو وانا نذوب مع لمساتو حركاتو واختلطت أنفاسنا ولقيت روحي فالفرش بين احضانوو وصار الي صار  بعد بقا ساكت وخرج شعل سيڨارو
أنا حسيت بدوخة وقلبي بدا يدق سيناريو هذا نعرفو .. قمت لبست حوايجي خرجت نلقاه قاعد في الصالة قعدت بجنبو تكيت عليه وحطيت راسي على صدرو وقتلو حبي شبيك ساكت قلي الي انت تحبني قلي الي عمرك ما تبعد عليا قلي الي باش نعرسو ونكونو اسعد عرايس  خزرلي  باحتقار وقلي لكلكم  كيف كيف  مفهمت شي ونسأل فيه امان حبي شبيك علاش تقول هكا قلي قداش لوقت توا  خزرت في تاليفوني قتلو 23:35 قلي باهي عندك 25دقيقة باش تقلب وجهك معادش نحب نرا وجهك فالعام الجديد أنا هبلت وقتها ترميت تحت ساقيه امان كي بش نخرج فين باش نمشي علاه شعملتك موش قلت تحبني موش قلت  بش نعرسو   قلي
_انا كي عرفتك حبيتك في بالي ماكش كالبنات الي عرفتهم في بالي طفلة نظيفة وبنت فاميليا ياخي طلعت هاملة عاملتهم الكل  وتحكيلي في حكاية حولة تحبني انا نتحمل نتيجت هملتك وفسادك يا مسخة كان جيت بالحق نظيفة راك مقبلتش تجي تبات معايا
أنا لاني مصدقة وذنيا لا عينيا ملقيتش دموع ملقيتش شهقة ملقيتش كلام  قام هو قص الموسيقي وجبد ناب تاع الطاولة ة وكل شي جا ا فالقاعة وتخلط الورد بالشكلاطة بابالڨاتو بالشمع قلي انت كنت حاجة مزيانة وتكسرت انت لحم رخيص برا  الشارع  وجبدني من شعري وخرجني بطريقة مهينة ة وقلي حقا قداش ومستانسة تخلص وبدا يرمي عليا فالفلوس كي ..

كرونيك اغتصبني أستاذي الجزء الرابع

مخيبهم ايامات الليسي وانا معذبة نرى في المجرم قدامي ومنجم نعملو شي تعداو ليامات خذيت الباك ومشيت نقرى في الجامعة نحيت الخمار خاطر ملبستوش عن قناعة وركزت على قرايتي وطلبت ربي بش يعوضني بحياة جديدة اما مع هذا كنت ديما حزينة ديما وحدي سارحة نخمم
نهار قاعدة وحدي فالكور جا طفل قعد بحذايا
منتصر : سلام
أنا :سلام
منتصر: مدموزال بربي نجم نسألك ؟
أنا : وي تفضل
منتصر؛ وهو يخزرلي في عينيا عندي برشا  وانا نرا فيك ديما قاعدة وحدك ديما حزينة نحس فما حاجة توجع فيك متنجمش تحكي عليها فما دمعة في عينيك
بقيت نخزرلو حسيت حاجة غريبة اول مرة حد يحس بيا ينتبه لحزني بالتفاصيل متاعو حتي دارنا ماحسوش بيا هكا
منتصر : شبيك سكت ؟
أنا : شي جيست مزلت جديدة ومنعرف حد هوني
منتصر : احسبني  صديقك وخوك وقت تستحقني تلقاني واي حاجة تنجم تحكيهالي انا : - مرسي
خذا نومرويا ومشى وانا نهارتها حسيت بفرحة رغم التجربة الي عشتها حسيت الي مزال فما خير فالدنيا
من غدوة كلمني تقابلنا في café جابلي شكلاطة ودبدوب قتلو شنوة المناسبة قلي المناسبة أنو فما بنية مزيانة  متغشة ويلزمها تضحك قتلو انت papa Noël  قلي تنجم تقول اما الفرق أنو أنا باش تشوفني قدامك كل يوم موش مرة فالعام  بقينا نضحكو تعلقت بيه فيسع وليت نتوحشو ولا هو الشمعة الي تنورلي حياتي  

نهار كلمني قلي نحب نتقابلو عندي موضوع نحب نحكي فيه معاك  تقابلنا قتلو فبل متحكي انا ديما نحكيلك على روحي وتو مزلت منعرف عليك شي  بالرغم الي نقراو في نفس الجامعة فلي الي عمرو  24 يتخرج السنا ...أنا تقجعت كي سمعت الي بش يكمل لقراية السنا وقتلو بش تخليني وحدي ودموعي هبطو وهوا تأثر وقلي  ما تبكيش تو نكمل master على خاطرك وليت نضحك  قتلو شنوة الموضوع الي تحب تحكيهالي قلي انت بنية مفمش كيفك وانا حبيتك برشا نحبك تولي  صاحبتي ودنيتي الكل وكي نكملو لقراية نعرسو 

كرونيك اغتصبني أستاذي : الجزء الثالث

كان اغتصاب وحشي خسرت فيه شرفي مسخفوشو دموعي وبىراءتي ومحسش بوجيعتي ومخمم كان في غريزتو الحيوانية  خلاني ملوحة عالفرش غارقة في دموعي ومشا يعمل في سيقارو رجع قلي 

-مبروك يا عروسة 

أنا : يا حيوان يا كلب يا فاسد 

هو :وانت شريفة بنت الفاضل  

أنا : نبكي 😰😰😥😓😥😪

هو : يزي عاد حبيبي خلينا شايخين متحط شي في بالك انت جايتها اللحظة هذي تو والا بعد 

أنا : اش بش نعمل يا ربي علاش يصير فيا هكا عمري معملت حاجة حرام عمري مخرجت مع طفل علاش يا ربي علاش  

هو : صدقتك ويزي مالأفلام ودور الضحية واكبر شويا في مخك  

أنا أن شاء الله ربي يشويك كيما شويتني نشاء الله اختك يصيرلها الي صارلي  هو : متجبدش اختي اختي متمشيش لدار عزاب ومتحلش ساقيها في vestiaire و تخلي الباب محلول باش الي يتعدي يكحل عالسلعة  

أنا تصدمت راسي يوجع تخنقت نحس في روحي تاعبة دايخة ما فاهمة شي ما نعرفش كيفاش لبست حوايجي وقمت اما نتذكر قتلو امان استرتني اخطبني وعرس بيا حتى شهر  وبعد طلقني وهو شدو كريز ضحك وقلي كان تحب تولي صحبتي نصرف عليك ودللني انا خرجت ونذكر الي هو يقلي في كلام مقزز من نوع lparfum  تاعك sexy محلاهم 2 piéce   الي لابستهم ... روحت للدار  بسيف وجايع في بدني وفي قلبي ملقيتش  أمي في الدار  سألت خويا صغير قلي مشات طل على خالي  خاطر مريض مشيت عملت دوش بقيت ساعة وانا نغسل نحس في روحي مسخة نحب نحي من بدني اثار كل لمسة ... 

بقيت جمعتين ممشيتش نقرى شادة الفرش منحبش ناكل منحب نحكي مع حد أمي  تبكي ومماتي تكركب عليا وتقلها هاذيكا عين خذاتها على قرايتها وخاطر بصحيحتها  بابا شد صحيح باش يهزني لطبيب وليت خفت قتلو هاني تحسنت وبش نرجع نقرى  . قبل منرجع نقرى قلت لدارنا نحب نتحجب  استغربوا مالحكاية اما قالولي على راحتك وقتها جيست حبيت نهرب نخبي روحي نخبي بدني  مشيت نقرى بجلباب وخمار ماما وشلاكة قديمة كل قطعة من لون ناس لكل ما عرفونيش ويسألو فيا شبيك وليت هكا  كملت  القراية نهارتها وانا مروحة خلط عليا واحد جبدني من كتفي تلفت  تفجعت تقولش عليا ريت وحش بقيت نخزرلو ومنجمتش ننطق حتى حرف 

هو :  ربي يقوي ايمانك ياشيخة ( وهو دايخ بالضحك ) ايا تجي بحذايا غدوة  للدار نصليو التراويح 

أنا : انت شنوا انسان حجرة شنوا ؟؟؟ 

هو ميجيش  تكلم أستاذك هكا 

أنا ؛ اسمعني مسيو حيوان مازلت تكلمني وإلا تقلقني نشكي بيك ونفضحك ونقول لدارنا  ألا ما يقتلوك   

دخل بعضو و بقا يتلفت وراه لا يسمعني حد وقلي بشوية 

كان تتكلم تفضح روحك جاوبتو 

-عادي انا  تو معاد يهمني شي  خسرت كل شي ونجم ندمرك انت في اي لحظة من وقتها معادش يقلقني جملا

اغتصبني أستاذي الجزء الثاني

وصلت  للدار بقيت نخمم زعما منقلقوش زعما ل proff  لاخر الي كاري معاه  ميتقلقش وبعد تكورجت  ونوقزت
حل الناب لابس  شورت وخلعة وقلي صباح الورد
أنا حشمت قتلو dsl  مسيو قلقتك
قالي مفما حتى قلق -مريومة تفضل ادخل
قتلو : موس لازم  راهو لازمني نمشي ☺☺
قلي ميجيش تبقى واقفة عالباب
أنا حشمت وليت دخلت  قلي تفضل اقعد قعدت  سألني شنوا الكرارس الي جايبتهم معاك  نحلك مشاكلك ونقريك ياسىر عليا
ضحكت وقتلو لا هذوكم هزيتهم وقلت لماما ماشية نقرى بحذا صاحبتي باش تخليني نخرج
ضحك وقلي : يا ڨنوشو يا ڨنوشو عمرك 18 ولتوة داركم يتحكمو فيك
ضحكت وسكت قلي الطقس سخون شبيك لابسة كبوط ايا نحي كبوطك وخوذ راحتك احسب روحك في داركم  وهاني بش نجيبلك jus   قتلو متعبش روحك اما هو  مشا
نحيت كبوطي وبقيت نخمم قلت قداش طلع محلاه مسيو وببقيت نخزر لدار والتحف
جا وجاب كاس jus
قتلو مسيو محلاها  دارك عندك ذوق كل شي فيها مزيان قعد بجنبي وبقا يخزر لبدني  وقلي انا ما نما نختار كان  الحاجة المزيانة نبقى تتخيلها ونحلم بيها لين تولي ملكي انا سكت .قلي اشرب jus شربت رشفة  وسألتو مسيو ياخي  وحدك  قلي الي  صاحبو روح لدارهم  فل week end
وبعد قلي تعرف شنوا شتهيت انا توا قتلو شنوا ؟  قلي نحب نذوق jus مديتلو الكاس ضحك وقلي نحب نذوق من شفايفك  انا خفت  قمت وقتلو  لازمني نمشي ياخي جندني بقوة وقربلي قلي تعرف قداش عندي نحلم بالللحظة  هذي من قبل بدنك مهبلني وملي ريتك فل vestiaire ب 2 pieces  وتو جيت مبين يديا مانيش بش نرحمك وبدا يبوس فيا من كل بلاصة وانا نترجى فيه بش ييسيبني ونقلو احسبني اختك ترضى يصير فيها هكا وهو يضحك ثق وكركرني لبيتو و صار الي صار

كرونيك اغتصبني أستاذي الجزء الأول

أنا مريم مزيانة بيضة ودبدوبة شوية شعىري اكحل وطويل عيني عسلية  قصيرة شوية ..حكايتي بدات وقت كان عمري  18 سنة كي كنت نقرا 3eme année
secondaire

كنت بنية عاقلة وقراية اصحابي الكل يحبوني واساتذتي يقدروني ويعزوني وشطر اولاد  كلاسنا مضروبين فيا اما أنا منحبش نصوحب نحس في روحي مزلت صغيرة ومخي كان في القراية  كنت مسلكتها في الماتيارات الكل اما في sport كعبة لا بحكم أنا دبدوبة و زيد في صغرتي أمي كانت تخاف عليا لا تخليني نجري ونلعب معا الصغار  لا نتكربس في الدار ديما تقلي تو طيح تو تتكسر ساقك بقا فيا الخوف هذاكا مالحركات الرياضية  . prof sport وقتها مسيو أنيس مهوش صعيب معانا بحكم مهوش كبير برشا عمرو 31 ديما يفدلك معانا وبالأخص أنا ديما يبدا يعاون فيا بش نعمل الحركات الرياضية كبما ل équilibre  وديما يبدا يقربلي ويحط يدو على ظهري وعلى بلايص اخرين في بدني ويقلي استوي ظهرك هز يدك ... زعما زعما يصلحلي فل الحركات وانا وقتها عمرو مجا لبالي إنو يبزنس فيا وإلا يخدم في مخو .
نهار  جيت مخر لليسي وقتها عنا ساعتين sport لعشية وانا نزرب نشوف في اولاد  كلاسنا في terrain تاع الليسي مشيت نجودري ل vestiaire باش نبدل حوايجي ونمشي قبل لا مسيو يعمل ل appel  دخلت ل vestiaire طيشت ساكي وبديت نحي في حوايجي نحيت chemise وسروال وحترى الخلعة نحيتها خاطر ال tenue تاعي 3 pièces وكملت سلسلة تاعي تحلت وطاحت لوطا  طبست نلوج عليها وانا هكاكا ب 2piece لقيتها سكرتها ومشيت باش نجيب ساكي باش نبدل كنت متلفتة للحيط وكي درت  شفت مسيو أنيس متعدي من  قدام الباب  مكانش يخردزر لداخل وكان يزرب تفجعت ودخلت بعضي زعما شافني وقت كنت مطبسة ونلوج عالسلسلة لبست دبشي ومشيت ل terrain وأنا داخلة بعضي وقلبي يدق تغدات séance هاذيكا عادي ما لاحظت عليه شي وطمنت ونحيت من مخي حكايت  أنو ينجم يكون شافني

كيف تصبح شخصا محبوبا ومميزا

يسعى جميع الناس على اختلاف أجناسهم وثقافتهم الى الحصول على محبة الٱخرين وتقديرهم وترك إنطباع بالتميز لديهم ولا شك أنك أحد الباحثين عن ترك  بصمة عطرة لدي المحيطين بك لتكون حياتك مزيجا من الود والانسجام مع الغير وفي ما يلي أضع بين يديك خطوات عملية تجني بها محبة الٱخرين واحترامهم :

تقدير الذات :

تخلص من النظرة السلبية عن نفسك فنظرتك لنفسك مرأة تنعكس في عيون الاخرين ولا تتوقع أن يعجب بك أحد او يحبك إذا كنت تحط من قدر نفسك فحاول دائما تقدير نقاط قوتك وإصلاح عيوبك 

النظرة المشرقة للحياة :

يحب الناس التواجد برفقة الأشخاص المرحين والمتفائلين الذين يلقون فيهم حب للحياة والإستمتاع بها فهؤلاء الأشخاص كالمغناطيس يجذبون كل من يصادفهم بينما ينفر الناس غالبا من صحبة صناع النكد الذي يسممون حياتهم بالشكوي والتذمر فكن راضيا بقضاء الله محسن الظن به ساعيا لتحقيق الأفضل وأستمتع بالنعم التي من الله بها عليك واغضض بصرك عن بعض المنغصات 

الكلمة الطيبة :

لقد حثنا ديننا الحنيف على اختيار الكلمات الحسان وذلك لوقعها الطيب في نفوس الٱخرين فعود لسانك على عذب الكلام من شكر ومدح ودعاء بالخير وسترى العجب .ألق التحية بذوق وبادر بالسؤال عن أصحابك وأهلك وتجنب النقد الجارح واللوم ولا تبالغ في النصح ولا تفرض افكارك على احد اجعل نصائحك على شكل اقتراحات .. 

احترم خوصيات الآخرين 

أحيانا يقودك حبك لأصدقائك وأهلك الى التدخل في شؤونهم الخاصة فتجد نفسك تريد معرفة أشياء لم يخبروك بها أو تخوض في أمور تخصهم امام الغير دون إذنهم وهذا يتنافى مع حسن الخلق فحول مسار هذه الطاقة الى حياتك واهتم بشؤونك وتذكر أن من راقب الناس مات هما

كن إجتماعيا :

لن ينتبه إلي إليك أحد اذا كنت تحبس نفسك بعيدا عن ديناميكية المجتمع فكيف تريد ان يلقي لك الناس بالا وانت تتخلف عن مناسباتهم ونقاشاتهم لذك حاول دائما التخلص من هيمنة اسوار بيتك او إهتماماتك الضيقة واقتحم الفضاء الاجتماعي .. اخرج برفقة اصدقائك، احضر الدورات والمناسبات العائلية وتعرف على أشخاص جدد حاورهم بثقة وناقش بأدب وسيجد الناس أنك شخص ممتع الرفقة وسيحبون قضاء الوقت بصحبتك 

طور نفسك شكلا وعقلا :

يعد المطهر الجميل والهندام الأنيق عاملا لا غنى عنه في جذب الانظار إليك فلا تكن شخصا مهملا لشكله وأناقته ولا تكرر نفسك ،حاول بين فترة واخرى اضفاء لمسة تجديد على مظهرك غير من قصة شعرك وعطرك واستشر من تثق بذوقه  

مع الاهتمام بمظهرك طور من نفسك وغذي عقلك وعمق معارفك فلم يعد ذلك بالأمر الصعب اليوم فكل الوسائل متاحة من كتب ودورات ومواقع فاجعل عقلك افضل ومهاراتك افضل وهو ما سيجعلك مميزا لدى الجميع .

وختاما أنصحك أن تترك الكسل والتمني وابدأ فورا رحلتك نحو التغيير التي ستجعلك شخصا فريدا يأسر القلوب